2017

Fakafetongi e Pa’anga Pepa mo e Pa’anga Maka kuo ‘ikai ke toe taau ki hono ngāue’aki

Kuo ma’u ‘e he Pangikē Pule Fakafonua ‘o Tonga´ ha ngaahi pa’anga maka kuo lahi hono ngāue‘aki´ pea hoko ai ‘o mole ‘a e ‘imisi ‘o ‘Ene ‘Afio´ pea mo e ngaahi fakatātā ‘oku hā ‘i he ngaahi pa’anga ni, ‘a ia ‘oku ‘ikai ke taau ke toe ngāue‘aki. Ko ia ai, ‘oku ‘oatu heni ‘a e kole mei he Pangikē Pule Fakafonua ‘o Tonga´: ki he kakai ‘o e fonua, ki he ngaahi pisinisi, ngaahi falekoloa pe ko ha kautaha, ke mou kātaki ke tau fengāue’aki fakataha ‘i hono fakafetongi ‘o e ngaahi pa’anga ko eni ‘oku ‘ikai ke toe taau ke ngāue‘aki´.

Ke mou kātaki ‘o fakafoki e pa’anga pepa mo e pa’anga maka kotoa pē kuo ‘ikai ke toe taau ki hono ngāue’aki´ ki he Pangikē Pule pē ki ha Pangikē pē, ka e fakafetongi atu ‘aki ha’amou pa’anga pepa pē pa’anga maka ma’a, fo’ou mo taau ki hono ngāue’aki. Kae ‘oua te mou toe ngāue’aki ki he fefakatau’aki pē ko ho’omou ngaahi ngāue faka’aho, he ko e ma’a ange ‘a e pa’anga ‘oku ngāue’aki ko e faingofua ange ia hono tala ‘a e pa’anga loi. ’Oku ‘uhinga ‘a e pa’anga pepa kuo ‘ikai ke toe taau ki hono ngāue’aki´, ki he pa’anga pepa ‘oku mahae, manuminumi, takohikohi’i pē ko ha tu’unga kuo mahino ‘oku ‘ikai ke toe taau ke ngāue’aki, pē ko ha pa’anga maka kuo mole ‘a e ‘imisi ‘o ‘Ene ‘Afio pē ko e fakatātā ‘oku tonu ke ‘asi ai, matolitoli pē mole ‘a e lanu.

‘Oku fakamanatu atu heni ke mou mea’i, ko hono maumau’i ‘o e pa’anga pepa pē pa’anga maka kotoa pē, ko e hia mamafa ‘eni ‘i he lao hotau fonua, ‘o hangē ko ia ‘oku tu’utu’uni ‘e he Kupu 23, Lao fakatonutonu ki he Pangikē Pule 2014.

Ki ha ngaahi fakaikiiki, kātaki fakafetu’utaki mai ki he:

Pangikē Pule Fakafonua ‘o Tonga
Fika Telefoni: (676) 24057 | Fax: (676) 24201
Meili 'Elekitulonika: This email address is being protected from spambots. You need JavaScript enabled to view it.

Ma'a e ngaahi kautaha ongoongo: Fanongonongo 'i he Lea Faka-Tonga