2018

Tu’utu’uni ki he Fokotu’utu’u Ngāue Fakapa’anga - Sepitema 2018

Na’e tali ‘e he Poate ‘a e kau Talēkita ‘a e Pangikē Pule Fakafonua ‘o Tonga´ hili ‘enau fakataha ‘i he ‘aho 18 ‘o Sepitema 2018, ke kei hokohoko atu ai pē ‘a e ngaahi tu’utu’uni ngāue fakapa’anga lolotonga ‘a ia ‘oku hā atu ‘i lalo´. ‘Oku fakataumu’a eni ke ngāue’aki ‘a e hulu ‘i he pa’anga ngāue ‘a e ngaahi pangikē, ‘o fakafou mai ‘i hono tuku atu ‘a e ngaahi nō ki tu’a ke ne faka’ai’ai mo pātoloaki ‘a e tupu faka’ekonōmika ‘a e fonua´ pea mo tokoni ki he fakaakeake meiˊhe saikolone fakatalopiki ko Gita (Tropical Cyclone Gita).

Na’e fakahā ‘e he Kōvana ‘o e Pangikē Pule´, Sione Ngongo Kioa, na’e lelei ange ‘a e tupu ‘a e ngaahi ngāue faka’ekonōmika´ ‘i he lolotonga ‘o e māhina´, ‘o ne fakahaa’i ai ‘a e tu’unga lelei ‘oku kamata ‘aki e ta’u fakapa’anga 2018/19. ‘I he sekitoa ki he ngoue´, toutai´ pea mo e vao ‘akau´ (primary sector), na’e kake ‘a hono uta atu e ngoue ki muli´, makatu’unga mei he lelei ange ‘a hono hū atu ‘o e ‘ufi´, talo´ pea mo e niu´. ‘Oku hokohoko atu ai pē ‘a e tupu ‘a e ngaahi ngāue ‘i he sekitoa ‘o e fakatupu koloa´ (secondary sector) ‘o hā mai mei he kei lahi pe ‘a e ngaahi nō fale taautaha´ pea pehē ki he nō ki he keli’anga koloa mo e maka´ (mining and quarrying). ‘I he sekitoa ki he ngaahi ngāue´ (tertiary industry), na’e tupu e tokolahi ‘a e kakai ne tu‘uta vakapuna mai ki Tongaˊni mei tu‘apule‘anga´ ‘o fenāpasi ia mo e tupu ‘i he pa’anga hū mai mei he fefolau’aki´ pea pehē ki he kake ‘i he lahi e vakapuna ne tu’uta mai ki Tonga ni´ pea mo e ngaahi katoanga ne fakahoko ‘i he lolotonga ‘o e mahina´. Na’e toe tupu mo e lahi e koniteina mo e me’alele na’e lēsisita ‘i he māhina´ ‘o hā mei ai e toe lelei ange ‘a e ngaahi ngāue ‘i he sekitoa ko ‘eni´.

Na’e tupu e ngaahi fiema’u´/ fengāue’aki´ (consumption activities) ‘i he māhina´ ‘o hā mai ai e tupu ‘i he pa’anga hū mai mei he tukuhau ngāue’aki´ (Consumption Tax) pea mo e hulu ‘i he pa’anga hū mai mei he fakatau ‘a e ngaahi pisinisi´. Na’e fenāpasi eni mo e lahi ange ‘a e ngaahi koniteina na’e lesisita´ pea pehē ki he tupu ‘i he totongi ‘o e ngaahi koloa fefakatau’aki ‘oku hū mai mei tu’apule’anga´. Na’e tupu ‘a e ngaahi nō kuo tuku atu fakataautaha´ ‘o fakamahino mei ai ‘a e toe lahi ange ‘a e ngaahi fakamole ‘a e kakai´. Na’e tokoni’i eni ‘i he tupu ‘a e talafi pa’anga mei muli´ mo e ngaahi nō fo’ou na’e tali ‘i he lolotonga ‘o e mahina´. ‘Oku fakafuofua ‘e toe lahi ange ‘a e ngaahi fakamole´ ‘i he kaha’u´ ‘o tokoni’i ‘e he ngaahi nō fo’ou fakataautaha´ pea pehē ki he fakafuofua ‘e hokohoko atu ‘a e kake ‘i he talafi pa’anga mei muli´.

‘Oku kei ‘i he tu‘unga lelei pe ‘a e fai fatongia ‘a e ngaahi pangikē fakakomēsiale´, ‘o makatu‘unga meiˊhe tu‘unga fakafiemālie ‘a ‘enau tupu´ (profitability) pea pehē ki he kei ‘i he tu‘unga ma‘ulalo ai pē ‘a e ngaahi nō ‘oku palopalema´. Na‘e hiki hake ‘a e pa‘anga ngāue (liquidity) ‘a e ngaahi pangikē ‘o makatu’unga mei he tupu ‘a e fakahū pa’anga ‘a e ngaahi pangikē ki he Pangikē Pule´. Na’e lahi ange ‘a e ngaahi fakahū pa’anga´ ‘o fakahoa ki he kake ‘o e ngaahi nō kuo tuku atu´ ‘o ne fakatupunga ai ‘a e holo ‘i he lahi ‘o e ngaahi nō ‘i hono fakahoa ki he lahi ‘o e ngaahi fakahū pa‘anga´ (loans/deposit ratio). ‘Oku kei ma’ulalo pē ‘eni ‘i he tu’unga kuo tu’utu’uni ‘e he Pangikē Pule´ ke a’usia ‘e he ngaahi pangikē, ‘a ia ko e peseti ‘e 80. ‘Oku hā mahino mei heni ‘a e kei ‘i ai pē ‘a e faingamālie ke toe fakalahi ‘a e ngaahi nō ke tuku atu ‘e he ngaahi pangikē. Na’e kake ‘a e hulu ‘i he ‘avalisi ‘o e totongi tupu ‘i he nō mo e ‘avalisi ‘o e totongi tupu ‘i he fakahū pa’anga´ (weighted average interest rate spread) ‘i Siulai ‘o makatu‘unga meiˊhe kake ‘i he ‘avalisi ‘o e totongi tupu ‘i he nō (weighted average lending rate) pea mo e holo ‘i he ‘avalisi ‘o e totongi tupu fakahū pa’anga (weighted average deposit rate).

Na‘e tupu ‘a e pa’anga talifaki ‘i muli´ (foreign reserves) ki he $476.5 miliona ‘i Siulai 2018, makatu‘unga meiˊ he si’isi’iange ‘a e totongi ki he ngaahi ngāue (services) pea mo e totongi ki he pa’anga hū atu tefito´ (primary income payment). ‘Oku fe‘unga ‘a e tu‘unga lolotonga ‘o e pa‘anga talifaki´ pea mo e māhina ‘e 7.9¹ ‘o e koloa mo e ngaahi ngāue hū mai mei muliˊ.

Na’e tokoni e fe’unu’aki ‘i he totongi koloa me’akai fakalotofonua´ mo e totongi ‘o e me’akai hū mai mei tu’apule’anga´ ki hono holoki ‘o e hikihiki ‘i he totongi fakalūkufua ‘o e koloa´. Na’e tokoni e holo e totongi ‘o e fua’i’akau´ mo e vesitapolo´ ki he holo ‘a e totongi koloa fakalotofonua´. Na’e hiki hake ‘a e totongi koloa hū mai mei muli΄, makatu’unga mei he kake ‘a e totongi ‘o e tapaka´. Neongo ‘a e holo e hikihiki ‘i he totongi fakalūkufua ‘o e koloa´ ‘i he mahina´, kā na’e kei kake pē ‘a e totongi fakalūkufua ‘o e ngaahi koloa fakata’u´ ki he peseti ‘e 6.1. Na’e makatu’unga eni mei he ma’ulalo ange ‘a e totongi ‘o e ngaahi koloa´ ‘i Siulai 2017 ‘o fakahoa ki he totongi lolotonga´. Na‘e hiki ‘a e totongi koloa hū mai mei muli΄ ‘o makatu‘unga mei he hiki hake ‘a e totongi ‘o e me’akai hū mai mei muli΄, totongi lolo΄ pea mo e tapaka΄. Na‘e toe hiki mo e totongi koloa fakalotofonua΄ makatu’unga mei he hikihiki ‘a e ngaahi koloa me’akai´ pea pehē ki he kava-Tonga΄.

‘Oku kei fakafuofua ‘e he Pangikē Pule´ ‘e tupu mā’olunga ‘a e tu’unga faka’ekonōmika ‘a e fonua´ ‘i he kaha’u´, kā ‘e ala uesia ‘a e fakafuofua ko ‘eni´ mei he ngaahi feliliuaki e ‘ea´. Fakatatau ki he fakamatala fakamuimuitaha kuo tuku mai ‘e he Tafa’aki Talamatangi ‘a Tonga, ‘oku fakafuofua ‘e ma’ulalo ange ‘a e ‘uha´ ‘i he ‘avalisi´ ‘i he ngaahi māhina ka hoko mai´. ‘E ala uesia heni e ngaahi ngāue ‘i he sekitoa ngoue´ mo e toutai´ pea pehē foki ki he ngaahi sekitoa kehekehe pē ‘i he kaha’u´. Ko e pa‘anga talifaki ‘i mulí ‘oku fakafuofua ‘e kei ‘i he tu’unga fakafiemālie pē. ‘Oku toe fakafuofua ‘e ‘i he tu’unga ma’ulalo pē ‘a e hikihiki ‘i he totongi koloaˊ pea ‘e ma’ulalo pē ia ‘i he tu’unga fe’unga (reference rate) ko e pēseti ‘e 5 ‘i he faka’osinga ‘o e 2018. ‘Oku hokohoko atu ai pē ‘a e tu’unga fakafiemālie ‘a e ngaahi pangikē.

Koe’uhī ko e ngaahi fakamatala ko ‘eni´, ‘e hokohoko atu ai pē ‘a e ngaahi tu’utu’uni ngāue fakapa’anga lolotonga´. Pea ‘e kei hokohoko atu ai pē ‘a e tokanga ‘a e Pangikē Pule´ ki hono siofi mo muimui’i ofi e ngaahi fakalakalaka faka’ekonōmika fakalotofonua´ mo tu’apule’anga´, mo tu’u mateuteu ke liliu ‘a e ngaahi fokotu’utu’u ngāue fakapa’anga ‘o ka fiema’u pea mo fakapapau’i ‘e ‘ikai ke kaunga kovi ‘a e ngaahi fakalakalaka ‘oku hoko´ ki he tupu faka’ekonōmika ‘oku ma’uma’uluta mo tolongaˊ.

1 - Na’e fakahoko ‘a e liliu ki he founga hono fika’i eni´, ke fakakau ‘a hono hū mai ‘a e koloa´ pea mo e ngaahi ngāue mei muli´. Ko e founga ne ngāue’aki ‘i he ngaahi lipooti kimu’a´ ne fakakau pē ‘a hono hū mai ‘a e koloa ‘ata’atā pē.

Ngaahi Faka'eke'eke

Va'a 'Ekonomika
Pangike Pule Fakafonua 'o Tonga
NUKU'ALOFA

Telefoni: (676) 24057
Fax: (676) 24201
Meili 'Elekitulonika: This email address is being protected from spambots. You need JavaScript enabled to view it.

Ngaahi Ma'u'anga Fakamatala

Ongoongo 'i he Lea Faka-Tonga  199 KB - Ma'u atu ha'o tatau 'o e ongoongo ni.

Vakai ki ha ngaahi Ongoongo 'o e 2018.