National Reserve Bank of Tonga

Makamaile Māhanga ‘a e Pangikē Pule Fakafonua ‘a Tonga ‘i he 2024

‘Oku faka’ilonga’i ‘e he Pangikē Pule Fakafonua ‘a Tonga hono ta’u 35 ‘i he ‘aho Monite 16 Sepitema 2024 ‘aki ha toe makamaile māhanga ko e tupu fakapa’anga (net profit) kuo ‘osi hono ‘aotita’i ‘a ia na’e fe’unga mo e $35 miliona. ‘Oku lahi hake ‘a e tupu ko eni ‘i he 2024 ‘aki ‘a e peseti ‘e 75 mei he tupu fakahisitolia ko ia ‘i he 2023 ‘a ia na’e $20 miliona. Hili hono tali ʻe he Poate ‘o e Pangikē Pule ʻa e Fakamatala Pa’anga Fakata’u ‘a e Pangikē Pule kuo ‘aotita’i ‘e he KPMG Fiji ma’ae ta’u fakapa’anga ‘oku ‘osi ki he ʻaho 30 ʻo Sune 2024, naʻe foaki ai ʻe he Sea ʻo e Poate ‘a e Pangikē Pule, Lord Sevele ‘o Vailahi, ‘i he Fakataha Lahi Fakataʻu ‘o e 2024 ‘a e Pangikē Pule he ʻaho ni ha sieke ʻoku fe’unga mo e $25.1 miliona ki he Palēmia, Hon. Hu’akavameilku ko e ‘inasi fakata’u mei he tupu ‘a e Pangikē.

Naʻe fakamālō’ia ʻe he Palēmia ʻo Tonga, Hon. Huʻakavameiliku ʻa e ngāue mālohi ʻa e Pangikē Pule ʻi he 2023 pea ʻoku maʻolunga ange ia he taimi ni ʻi he 2024 pea ne pehe "ʻOku ʻomi ʻe he ngāue mālohi ʻa e Pangikē Pule ha paʻanga hu mai lahi ange ki he Puleʻanga ke poupouʻi ‘ene ngaahi taumu’a langa fakalakalaka ʻoku fakamuʻomuʻa ʻo kau ki ai sekitoa taautaha hange ko hono poupouʻi ʻetau ngaahi kautaha iiki mo lotoloto ‘o fakafou ‘i he Potungāue ʻo e Fefakatauʻaki mo e Langa Fakalakalaka Fakaʻekonomika, Potungāue Ngoue mo e Toutai, paotoloaki e tu’u mateuteu ke matu’uaki e fakatamaki, fakalakalaka fakaʻilekitulonika mo e tekinolosia ke fakasiʻisiʻi e fakamole taautaha ʻa e ngaahi pisinisi. Ko hono tānaki ‘o e pa’anga hū mai ko eni ki he Puleʻanga ʻe fakasiʻisiʻi ai ʻa e fiemaʻu ke nō pe fakalahi ʻa e tukuhau ke tauhi ʻene ngaahi palanisi fakapaʻanga ke toe faingofua mo tuʻuloa ange.

“‘Oku ‘oatu ‘a e fakamālō kia Lord Sevele mo e Poate´, Kovana Tatafu Moeaki mo e kau ngāue ‘a e Pangikē ki he ngāue ‘osi-kia-velenga makatu’unga ‘i he mafatukituki homou fatongia ko e Pangikē Pule Fakafonua ‘a Tonga ki hono langa ‘a e tu’unga matu’uaki ‘a e ‘ekonōmika ‘a Tonga´, he ko e ‘ekonōmika ‘oku si’isi’i, pea tu’u laveangofua ki he ngaahi fakatamaki fakaenatula´, ngaahi fakatamaki fakatupakē mei tu’apule’anga´ mo e ngaahi pole fakamāmani lahi foki. ‘Oku poupou ‘a e Pule’anga´ ki he fakahoko fatongia mafatukituki ‘a e Pangikēe´ ‘i hono fakahoko ‘a e fa’unga ngāue fakapa’anga ‘i he ta’u ‘e ua (2) kuo maliu atu´ fakatatau ki he polokalama sivi fakata’u ‘i he Misiona Article IV ‘a e Kautaha Pa’anga Fakavaha’apule’anga´ ‘i he ta’u 2023 mo e 2024, mo e fatongia ‘o e Pangikē ki hono ta’ota’ofi ‘a e hikihiki ‘i he tu’unga ‘o e totongi koloa´ mo e tu’unga malu e ngaahi tafa’aki fakapa’anga´ ke tokoni ki he ngaahi taumu’a ngāue faka’ekonōmika ‘a e Pule’anga´ ma’ae kakai ‘o Tonga” ko e me’a ia ‘a e ‘Eiki Palēmia´ Hu’akavameiliku.

Na‘e fakahā foki ‘e Lord Sevele “‘oku kei fakafiemalie pe ‘a e sekitoa faka-pangikēˊ pea ‘i he tu’unga fe’unga pē ‘a e pa’anga ngāueˊ pea mo e pa’anga tupu ‘a e ngaahi pangike ke ne fakapapau’i ‘a e malu mo e tu’unga lelei ‘a e ngaahi koloa lolotonga hono tokanga’i ko ia ‘a e lahi ‘o e ngaahi nō palopalema ‘i he ta’u 2024. Ko e ngaahi tefito’i ta’umu’a ‘a e Pangikē Pule Fakafonua ‘a Tonga ki he kaha’u´ ko hono ta’ofi ‘a e ngaahi hia fakapa’anga´ mo toe kake’i hake ‘a e tu’unga faitotonu ‘i he ngaahi tafa’aki fakapa’anga.”

‘Oku ‘oatu ha fakamālō mei´he Sea´ mo e Poate ‘o e kau Talēkita´ ki he Kōvana´ Tatafu Moeaki mo e kau ngāue ‘o e Pangikē Pule Fakafonua ‘o Tonga´, kae‘uma‘ā ‘a e Pule‘anga´, ngaahi kautaha laiseni fakapa‘anga´ mo e ngaahi hoa ngāue´ ‘i he ngaahi poupou ki he Pangikē´ ‘i hono a‘usia ‘ene ngaahi taumu‘a ngāue lolotonga ‘a e ta‘u fakapa‘anga 2023/24.

ʻE fakamanatu ʻe he Pangikē Pule Fakafonua ‘o Tongaˊ ʻa hono taʻu 35 ʻi he ʻaho Monite 16 ʻo Sepitema 2024 ʻi he Hotele Tanoa mo e Fakaafe Fakalangilangi ko e Tama ko Pilinisi Kalauni Tupoutoʻa ʻUlukalala.

Ngaahi Faka'eke'eke

Pangike Pule Fakafonua 'o Tonga
Fasi mo e Afi
NUKU'ALOFA

Telefoni: (676) 24057
Fax: (676) 24201
'Imeili: This email address is being protected from spambots. You need JavaScript enabled to view it.

Resources

Ongoongo 'i he Lea Fakapilitania 133 KB - Ma'u atu ha tatau 'o e ongoongo.

Ongoongo 'i he Lea Faka-Tonga  123 KB - Ma'u atu ha tatau 'o e ongoongo.