National Reserve Bank of Tonga

Ikuna 'e he Seti Pa'anga Pepa Fo'ou 2023 'o Tonga 'a e Pale HSP 'Esia 2024 Ki he Pa'anga Fo'ou Lelei Taha

Na‘e ikuna ‘e he Pangikē Pule Fakafonua ‘o Tonga΄ ‘a e pale ki he “Pa‘anga Fo‘ou Lelei Taha” ‘o e High Security Printing (HSP) Asia 2024 ‘a ia ko e ngaahi Pa‘anga Fo‘ou eni na‘e huufi ‘e he Tama Pilinisi ko Ata ‘i he ‘aho 4 ‘o Tisema 2023 ‘i Nuku‘alofa. Ko e ngaahi foaki pale tu‘ukimu‘a ko eni ki he Pa‘anga Fo’ou mo e Fakamatala Taautaha (ID Document) lelei taha ‘i he feitu’u ‘Esiaˊ ko e konga ia ‘o e Konifelenisi HSP ‘Esia ‘a ia na‘e fakahoko ‘i Bangkok, Thailand ‘i he ‘aho 2 ki he ‘aho 4 ‘o Tisema 2024. Na‘e fakafofonga‘i ‘a e Pangikē Pule΄ ‘e he Tokoni Kōvana΄, ‘Ungatea Latu fakataha mo e Pule ki he Tafa‘aki Pa‘anga΄ Viliami ‘Akau‘ola ‘i hono ma‘u mai ‘o e pale΄.

	‘Oku ho‘ata mei he pale ko ‘eni ‘a e tu‘unga fakavaha‘apule‘anga kuo a‘usia ‘e he pa‘anga Tonga´, mo e tu‘unga ‘oku ‘i ai ‘a e ngaahi malu‘i fakatekinolosia ‘o e pa‘angaˊ he ‘oku hā ai hotau hisitolia, ngaahi tefito‘i tui, pea mo e visone ki he kaha‘u. - Kōvana Tatafu Moeaki

Ko e pa‘anga fakamuimui taha ‘a Tonga´ni ne paaki ia ‘i he lau’i pepa angamaheni (paper) mo e lau’i pepa polimā (polymer), ‘a ia na’e fo’u mo paaki ‘e he kautaha De La Rue ‘i he malumalu ‘a e mafai ‘o e Fakataha Tokoni ‘a Tonga. ‘Oku ho’ata mai ‘i he ngaahi lau’i pa’anga fo’ou ko eni´ ‘a e mahulu atu ‘etau ngaahi anga fakafonua´, talanoa hisitōlia´, pea mo e ngaahi taumu’a ngāueˊ. ‘Oku kau ki ai hono tu’uaki atu ‘a e takimamataˊ (mamata tofua’a), ngaahi mātanga´ (Ha’amonga ‘a Maui), ngaahi ouau fakafonuaˊ (Ouau Kava Milolua), tupu faka’ekonōmika (Fale ‘o e Pangikē Pule Fakafonua ‘o Tonga), tu’unga ma’uma’uluta ‘o e mafai fakatakiˊ (Fale Fakapule’anga St. George), pea mo e Fale ‘o Ha’a Moheofoˊ (Palasi Faka-Tu’i). ‘Oku paaki mo faka’esia ‘a e ‘īmisi ‘o ‘Ene ‘Afio´ Tama Tu’i Tupou VI ‘i lotomālie ‘i he ngaahi lau’i pa’anga kotoa pe.

Na’e pehē ‘e Kōvana Moeaki, “’Oku fiefia ‘a e Pangikē Pule Fakafonua ‘o Tonga´ ke ma’u ‘a e paleˊ ni ‘i he ta’u 20 ‘o e Pale ‘Esia 2024ˊ mo e loto hounga’ia koe’uhiˊ ko hono tali lelei ‘e he Fakataha Tokoni ‘a ‘Ene ‘Afioˊ, ke fakahoko ‘a hono fo’u pea tuku atu ‘a e pa’anga fo’ou´ ‘i he fengaue’aki mo e Kautaha De La Rue. Ko e pale ko ‘eni ‘oku ne faka’ilonga’i ‘a e tu’unga fakavaha’apule’anga kuo a’usia ‘e he pa’anga Tonga´ mo e tu‘unga ‘oku ‘i ai ‘a e ngaahi malu‘i fakatekinolosia ‘o e pa‘anga´ he ‘oku hā ai hotau hisitolia, ngaahi tefito‘i tui, pea mo e visone ki he kaha‘uˊ. Na’e ‘osi kau atu foki ‘a e Pangike Pule ‘o Fisi, Nu’usila pea mo Papua Niukini mei he Pasifiki, ‘i hono ma’u ‘a e pale ko ‘eni ki hono fo’u mo ngaahi ‘o e Pa’anga Pepa lelei tahaˊ.

Na’e toe pehē foki ‘e Ms. Ruth Euling ko e Talekita Pule ‘a e De La Rue "ʻOku mau kaungā fiefia mo e Pangikē Pule Fakafonua ʻo Tonga´ ‘i homou maʻu ʻa e pale mahu’inga ko ʻeni. ‘Oku mau fakamālō foki ‘i homou fili ke mau hoko ko e hoa ngaue ‘i he poloseki´ni, pea ʻoku hounga moʻoni kiate kimautolu hoʻomou falala mai kiate kimautolu."

Ko e pa’anga ‘oku lahi taha hono ngāue’akiˊ ko e Pa’anga 5 mo e 10 pea ko e fuofua taimi eni ke paaki ai ‘i he pa’anga tolonga mo malu ko e polimā ke fakapapauʻi ʻoku tolonga mo malu ki hono ngāue faka’aho ‘aki. Ko e ngaahi pa’anga keheˊ ‘o kau ki ai e Pa’anga 2, 20, 50 mo e 100 ‘oku paaki ia ‘i he pepa angamaheni´.

Ki ha toe fakaikiiki, kataki fetu‘utaki mai ki he:

Tafa'aki Tokanga'i 'o e Pa'anga
Tafa‘aki Pa‘anga Pangikē Pule Fakafonua ‘o Tonga
Telefoni: (676) 24057; Kōvana: (676) 7815722
‘Imeili: This email address is being protected from spambots. You need JavaScript enabled to view it. | Peesi ‘Initaneti: www.reservebank.to