National Reserve Bank of Tonga

Tu’utu’uni ki he Fokotu’utu’u Ngāue Fakapa’anga

Na’e tali ‘e he Poate ‘a e kau Talēkita ‘a e Pangikē Pule Fakafonua ‘o Tonga´ ke kei hokohoko atu ai pē ‘a e ngaahi tu’utu’uni ngāue fakapa’anga lolotonga´ ‘a ia ‘oku hā atu΄, hili ia ‘enau fakataha na’e fakahoko ‘i he ‘aho 31 ‘o Siulai 2017. ‘Oku fakataumu’a eni ke ne faka’ai’ai mo pātoloaki ‘a e ngaahi ngāue faka’ekonōmika ‘a e fonua´.

Na’e fakahā ‘e he Kōvana ‘o e Pangikē Pulé, Sione Ngongo Kioa, na’e fetō’aki pē ‘a e ngaahi ngāue faka’ekonōmika fakalotofonuá ‘i Mē 2017. Fakatatau ki he ola ‘a hono uta atu e ngoue ki mulí, na’e hiki hake tupu mei he lahiange ‘a e ‘akau foha ne utu ‘i he lolotonga e mahina΄. ‘Oku hokohoko atu ai pē tupu ‘a e ngaahi ngāue ‘i he sekitoa ‘o e fakatupu koloá ‘a ia ‘oku ho’ata mai mei he lahi ange ‘a e nō langa fale taautaha ‘i he mahina ni, ‘a ia ‘oku tokoni ia kihe tupu ‘a e sekitoa langa΄. Na’e hiki hake mo e tupu ‘i he sekitoa ki he ngaahi ngāue (tertiary sector) ‘i he lolotonga ‘o e mahiná, ‘a ia na’e hiki ‘a e lahi ‘o e ngaahi koniteina ‘oku hū mai mei mulí ‘aki ‘a e peseti ‘e 24.5, pea kake ‘a e tu’uta vakapuna mai ki Tonga ní mei tu’apule’angá ‘aki ‘a e peseti ‘e 21.0.

‘Oku kei ‘i he tu’unga lelei ‘aupito ‘a e fai fatongia ‘a e ngaahi pangikē fakakomēsialé, ‘o makatu’unga mei he tu’unga fakafiemālie ‘a ‘enau tu’unga tupú (profitability) pea pehē ki he kei ‘i he tu’unga mā’ulalo ai pē ‘a e ngaahi nō ‘oku palopalemá. Na’e hiki hake ‘a e pa’anga ngāue (liquidity) ‘a e ngaahi pangikē ki he $284.8 miliona, ‘o tupu ia mei he lahiange ‘a e fakahū pa’anga ‘a e ngaahi pangikē fakakomēsialé ki he Pangike Pulē ‘i he lolotonga ‘o e mahina ko Mē. ‘Oku kei ma’ulalo pē ‘a e lahi ‘o e ngaahi nō ‘i hono fakahoa ki he lahi ‘o e ngaahi fakahū pa’angá (loan/deposit ratio) ‘i he tu’unga kuo tu’utu’uni ‘e he Pangike Pule´ ke a’usia ‘e he ngaahi pangike´, ‘a ia ko e pēseti ‘e 80. ‘Oku hā mahino mei heni ‘a e kei ‘i ai pē ‘a faingamālie ke toe fakalahi ‘a e ngaahi nō ke tuku atu ‘e he ngaahi pangikē. Na’e holo si’i ‘a e hulu ‘i he 'avalisi 'o e totongi tupu 'i he nō mo e 'avalisi 'o e totongi tupu 'i he fakahū pa'anga´ (weighted average interest rate spread) ki he peseti ‘e 5.682 tupu mei he lahi ‘a e holo ‘i he ‘avalisi ‘o e totongi tupu ‘i he nō (weighted average lending rate) ‘o fakatatau ki he holo ‘a e ‘avalisi ‘o e totongi tupu ‘i he fakahū pa’anga΄ (weighted average deposit rate). Na’e hiki hake ‘a e pa’anga talifaki ‘i mulí (foreign reserves) ‘aki ‘a e $20.6 miliona ki he $392.3 miliona ‘i he faka’osinga ‘o Mē, makatu’unga mei he hū mai ‘a e ngaahi pa’anga tokoni ki he patiseti ‘a e Pule’anga΄. ‘Oku fe’unga ‘a e tu’unga lolotonga ‘o e pa’anga talifaki´ pea mo e  māhina ‘e 7.2 ‘o e koloa mo e ngaahi ngāue hū mai mei muli´¹ (import), ‘a ia ‘oku kei mā’olunga pē eni ‘i he tu’unga ma’ulalo taha ‘oku fiema’u ‘e he Pangikē Pule´, ‘a ia ko e māhina ‘e 3 ki he 4 ‘o e koloa hū mai mei muli´.

‘Oku hokohoko atu ai pē ‘a e hikihiki ‘i he totongi koloa fakata’ú, ‘o hiki ‘aki e pēseti ‘e 10.0 ‘i he faka’osinga ‘o e ta’ú ki Mē 2017. ‘Oku makatu’unga ‘a e hiki fakata’u ko ‘ení mei he ngaahi totongi tute fo’ou ne fakahoko ‘i Siulai 2016, ‘a ia na’a ne hiki’i hake ai ‘a e totongi ‘o e ngaahi koloa hū mai mei mulí ‘aki ‘a e peseti ‘e 11.8. Na’e hiki hake foki mo e totongi koloa fakata’ú fakalotofonuá ‘aki ‘a e peseti ‘e 7.8 makatu’unga mei he lahi e fetō’aki ‘i he totongi ‘o e koloa me’akai fakalotofonuá, hiki e totongi ‘o e ‘uhila΄, pea mo e si’isi’i ange ‘a e lahi ‘o e kava-Tongá.

‘Oku kei fakafuofua pē ‘e he Pangikē Pulé ‘e mālohi ‘a e tupu faka’ekonōmika fakalotofonuá ‘i he kaha’u. Ko e pa’anga talifaki ‘i mulí ‘oku fakafuofua ‘e kei ‘i he tu’unga fakafiemālie pē. ‘Oku makatu’unga eni mei he fakafuofua ‘e kei ‘i he tu’unga mā’olunga ai pē ‘a e ngaahi talafi pa’anga mei mulí pea pehē ki he pa’anga tokoni mei he ngaahi hoa ngāue langa fakalakalaká, neongo ‘e ala uesia ‘a e fakafuofua ko ‘ení mei he fakafuofua ‘e toe lahi ange mo e totongi ‘o e koloa hū mai mei mulí. ‘Oku toe fakafuofua ‘e kei hokohoko atu ai pē ‘a e hikihiki ‘i he totongi koloá ‘i he kaha’u vave maí, ‘o makatu’unga mei he ngaahi totongi tute fo’ou ne fakahoko ‘i Siulai 2016, pea ke toki holo ki he tu’unga fe’unga ‘i he fakafuofua ‘a e Pangikē Pulé (reference rate) ‘i he ta’u fakapa’anga 2017/18 ‘a ia ko e pēseti ‘e 5. Ka neongo ia ‘oku malava ke uesia ‘a e ngaahi fakafuofua ko ’eni mei he feliliuaki ‘o e ‘eá, pea mo ha toe ma’olunga ange ‘a e totongi koloa hū mai mei mulí.

Na’e aofangatuku ‘e he Kovana΄, ‘e kei hokohoko atu ai pē ‘a e tokanga ‘a e Pangikē Pulé ki hono siofi mo muimui’i ofi e ngaahi fakalakalaka faka’ekonōmika fakalotofonuá mo tu’apule’angá, mo tu’u mateuteu ke liliu ‘a e ngaahi fokotu’utu’u ngāue fakapa’angá ‘o ka fiema’u, ke tauhi e ma’uma’uluta ‘a e tu’unga fakapa’angá pea mo langa hake ha sisitemi fakapa’anga ‘oku malu mo lelei pea mo fakapapau’i ‘e ‘ikai ke toe kaunga kovi ‘a e ngaahi fakalakalaka ‘oku hoko´ ki he tupu faka’ekonomika ‘oku ma’uma’uluta mo tolonga.

1 - Na’e fakahoko ‘a e liliu ki he founga hono fika’i eni´, ke fakakau ‘a hono hū mai ‘a e koloa´ pea mo e ngaahi ngaue mei muli´. Ko e founga ne ngāue’aki ‘i he ngaahi lipooti kimu’a ne fakakau pē ‘a hono hū mai ‘a e koloa ‘ata’atā pē.

Ngaahi Faka'eke'eke

Va'a 'Ekonomika
Pangike Pule Fakafonua 'o Tonga
NUKU'ALOFA

Telefoni: (676) 24057
Fax: (676) 24201
Meili 'Elekitulonika: This email address is being protected from spambots. You need JavaScript enabled to view it.

Ngaahi Ma'u'anga Fakamatala

Ongoongo 'i he Lea Faka-Tonga 141 KB - Ma'u atu ha'o tatau 'o e ongoongo ni.

Vakai ki ha ngaahi Ongoongo 'o e 2017.